គម្រោងរបស់យើងផ្តល់សេវាគាំទ្រផ្លូវចិត្ត និងព្យាបាលផ្លូវចិត្តដល់អ្នកជំងឺផ្លូវិចត្តរ៉ាំរ៉ៃ និងក្រុមគ្រួសាររបស់គេ។ ប្រសិនបើមានតម្រូវការចាំបាច់ យើងនឹងផ្តល់ការគាំទ្រសេវាផ្នែកសង្គម និងមនុស្សធម៌សម្រាប់អ្នកជំងឺនិងក្រុមគ្រួសារផងដែរ។
#28, Mao Tse Tung Blvd, Sangkat Beung Trabek, Khan Chamkar Mon, Phnom Penh
(+855) 12 573 233/012 687 185
sotheara@tpocambodia.org
នៅមានអ្នកជំងឺផ្លូវចិត្តជាច្រើននៅតំបន់ជនបទដាច់ស្រយាលក្នុងប្រទេសកម្ពុជាយើងដែលត្រូវបានក្រុមគ្រួសារ ចង ឬ ដាក់ច្រវ៉ាក់ ឬ ចាក់សោរបង្ខាំងទុកក្នុងផ្ទះឬក្រោមដើមឈើ។ សកម្មភាពទាំងនេះកើតមានស្ទើរតែគ្រប់សហគមន៍ក្នុងប្រទេសកម្ពុជា ព្រោះសមាជិកគ្រួសារគាត់មិនដឹងនូវវិធីជួយ ឬ ព្យាបាលជំងឺបែបនេះ។ ម្យ៉ាងទៀត ដោយសារភាពក្រីក្រ ដោយសារកង្វះខាតសេវាព្យាបាលជំងឺផ្លូវចិត្តនៅមូលដ្ឋានរបស់ពួកគាត់ និងដោយសារខ្វះការយល់ដឹងពីជំងឺផ្លូវចិត្ត ធ្វើឱ្យក្រុមគ្រួសារមិនអាចស្វែងរកសេវាព្យាបាល ឬ មិនថែទាំអ្នកជំងឺទាំងនោះឡើយ។
ក្នងឱកាសខួបទី ២០ ថ្ងៃកំណើតអង្គការធីភីអូ កម្ពុជាដែលប្រារព្ធទៅក្រោមព្រះរាជាធិបតីភាពព្រះបរមនាថព្រះករុណាព្រះបាទនរោត្តមសីហមុនី ព្រះអង្គសពព្រះរាជហឫទ័យផ្តល់ព្រះរាជអំណោយជាទឹកប្រាក់ ៥ ពាន់ ដុល្លារ សហរដ្ឋអាមេរិក ដើម្បីចូលរួមចំណែកជាមួយធីភីអូ ក្នុងការផ្តល់សេវាសុខភាពផ្លូវចិត្តជូនប្រជាជន កម្ពុជា។ អង្គការធីភីអូ កម្ពុជាបានយកថវិកានេះទៅបង្កើត “គម្រោងព្យាបាលនិងដោះច្រវ៉ាក់” នេះឡើងក្នុងគោលបំណងដើម្បីលើកកម្ពស់ការយល់ដឹងពីជំងឺផ្លូវចិត្តដល់ប្រជាជនកម្ពុជានៅជនបទ ដើម្បីព្យាបាល និងឈានទៅរកការដោះលែងពួកគាត់ពីច្រវ៉ាក់ឱ្យពួកគាត់អាចរស់នៅដូចធម្មតាវិញ។ នេះជាការបង្ហាញដល់ក្រុមគ្រួសារថា វាមានវិធីព្យាបាលដ៏មានប្រសិទ្ធិភាព ក្រៅពីការចាប់ចង និងដាក់ច្រវ៉ាក់អ្នកដែលកំពុងរងគ្រោះពីជំងឺផ្លូវចិត្ត។
ក្រុមការងារយើងនឹងធ្វើដំណើរគ្រប់ទីកន្លែងដើម្បី ព្យាបាលនិងដោះច្រវ៉ាក់ជូនអ្នកជំងឺទាំងនោះឱ្យបានច្រើនបំផុតតាមដែលអាចធ្វើទៅបាន ហើយយើងនឹងធ្វើការងារនេះរហូតដល់លែងមានអ្នកជំងឺផ្លូវចិត្តបន្តជាប់ ច្រវ៉ាក់ក្នុងប្រទេសកម្ពុជាទៀត។